ശ്രീ പരശുരാമ സ്വാമിയാൽ സൃഷ്ടമായ കേരളത്തിൻ്റെ തെക്കേയറ്റത്ത് ചരിതം ഉറങ്ങുന്ന തിരുവനന്തപുരത്ത് പ്രകൃതി രമണീയമായ തിരുമലയിൽ അണ്ണൂർ ദേശത്ത് കളകളാരവം മുഴക്കി മന്ദം മന്ദം ഒഴുകുന്ന കരമനയാരിൻ്റെ കരയിൽ ഉയർന്ന കുന്നിൻ പുറത്ത് ദേശത്തിനു മുഴുവൻ ചൈതന്യവും പകർന്നുകൊണ്ട് വിരാജിക്കുന്ന പഴക്കം അവകാശപ്പെടാവുന്ന പുരാതന ക്ഷേത്രമാണ് തിരുമലയിൽ അണ്ണൂർ ദേശത്തെ ശ്രീ.അണ്ണൂർ ഭഗവതി ക്ഷേത്രം തിരുവനന്തപുരത്തെ എല്ലാ അമ്പലങ്ങളേയും പോലെ ഇതിൻറെ സ്ഥാപനവും കൈകാര്യവും ആദ്യം ആരംഭിച്ചത് അണ്ണൂർ പ്രദേശത്തെ പ്രസിദ്ധമായ നായർ കുടുംബ കാരണവരിൽ നിന്നുമാണ്.
ഏഴര വെളുപ്പിന് ഉണർന്ന് മനോഹരിയായ കരമനയാറ്റിൽ മുങ്ങിക്കുളിച്ച് ദേഹശുദ്ധി വരുത്തി കിഴക്കോട്ടു തിരിഞ്ഞു നിന്ന് ഈശ്വര പ്രാർത്ഥന നടത്തി വന്ന സ്ഥലത്ത് കാലക്രമേണ അമ്പലം രൂപപ്പെട്ട് വന്നതായിട്ടാണ് പഴമക്കാർ പറയുന്നത്. ആ കാലഘട്ടത്തിൽ തിരുവനന്തപുരത്തെ എല്ലാ നായർ തറവാടുകളിലും ഉണ്ടായിരുന്നതുപോലെ ആരാധനയ്ക്കായി ഒരു തറയും അതിൽ ഒരു പീഠവും കലമാൻ കൊമ്പ്, വാൽക്കണ്ണാടി എന്നിവയും പ്രതിഷ്ടിച്ചാണ് ആരാധിച്ചു വന്നിരുന്നത്.
